Vishnu Padadi Keshanta Stotram

lakShmIbharturbhujAgre kR^itavasati sitaM yasya rUpaM vishAlam nIlAdrestu~NgashR^i~Ngasthitamiva rajanInAthabimbaM vibhAti | pAyAnnaH pA~nchajanyaH sa ditisutakulatrAsanaiH pUrayan svaiH nidhvAnairnIradaughadhvaniparibhavadairambaraM kamburAjaH ॥1॥

Ahuryasya svarUpaM kShaNamukhamakhilaM sUrayaH kAlametam dhvAntasyaikAntamantaM yadapi cha paramaM sarvadhAmnAM cha dhAma | chakraM tachchakrapANerditijatanugaladraktadhArAktadhAram shashvanno vishvavandyaM vitaratu vipulaM sharma gharmAMshushobham ॥2॥

avyAnnirghAtaghoro haribhujapavanAmarshanAdhmAtamUrteH asmAn vismeranetratridashanutivachaHsAdhukAraiH sutAraH | sarvaM saMhartumichChorarikulabhuvanaM sphAravisphAranAdaH saMyatkalpAntasindhau sharasalilaghaTAvArmuchaH kArmukasya ॥3॥

jImUtashyAmabhAsA muhurapi bhagavadbAhunA mohayantI yuddheShUddhUyamAnA jhaTiti taTidivAlakShyate yasya mUrtiH | so.asistrAsAkulAkShatridasharipuvapuHshoNitAsvAdatR^ipto nityAnandAya bhUyAnmadhumathanamanonandano nandako naH ॥4॥

kamrAkArA murAreH karakamalatalenAnurAgAdgR^ihItA samyagvR^ittA sthitAgre sapadi na sahate darshanaM yA pareShAm | rAjantI daityajIvAsavamadamuditA lohitAlepanArdrA kAmaM dIptAMshukAntA pradishatu dayitevAsya kaumodakI naH ॥5॥

yo vishvaprANabhUtastanurapi cha hareryAnaketusvarUpo yaM sa~nchintyaiva sadyaH svayamuragavadhUgarbhAH patanti | cha~nchachchaNDorutuNDatruTitaphaNivasAraktapa~NkA~NkitAsyam vande ChandomayaM taM khagapatimamalasvarNavarNaM suparNam ॥6॥

viShNorvishveshvarasya pravarashayanakR^itsarvalokaikadhartA so.anantaH sarvabhUtaH pR^ithuvimalayashAH sarvavedaishcha vedyaH | pAtA vishvasya shashvatsakalasuraripudhvaMsanaH pApahantA sarvaj~naH sarvasAkShI sakalaviShabhayAt pAtu bhogIshvaro naH ॥7॥

vAgbhUgauryAdibhedairviduriha munayo yAM yadIyaishcha puMsAm kAruNyArdraiH kaTAkShaiH sakR^idapi patitaiH sampadaH syuH samagrAH | kundendusvachChamandasmitamadhuramukhAmbhoruhAM sundarA~NgIm vande vandyAmaseShairapi murabhiduromandirAmindirAM tAm ॥8॥

yA sUte sattvajAlaM sakalamapi sadA saMnidhAnena puMsaH dhatte yA tattvayogAchcharamacharamidaM bhUtaye bhUtajAtam | dhAtrIM sthAtrIM janitrIM prakR^itimavikR^itiM vishvashaktiM vidhAtrIm viShNorvishvAtmanastAM vipulaguNamayIM prANanAthAM praNaumi ॥9॥

yebhyo.asUyadbhiruchchaiH sapadi padamuru tyajyate daityavargaiH yebhyaH sarvagIrvANavargaH mUrdhnA dhartum satatam spR^ihayati cha | nityaM nirmUlayeyurnichitataramamI bhaktinighnAtmanAM naH padmAkShasyA~NghripadmadvayatalanilayAH pAMsavaH pApapa~Nkam ॥10॥

rekhA lekhAdivandyAshcharaNatalagatAshchakramatsyAdirUpAH snigdhAH sUkShmAH sujAtA mR^idulalitatarakShaumasUtrAyamANAH | dadyurno ma~NgalAni bhramarabharajuShA komalenAbdhijAyAH kamreNAmreDyamAnAH kisalayamR^idunA pANinA chakrapANeH ॥11॥

yasmAdAkrAmato dyAM garuDamaNishilAketudaNDAyamAnAt AshchyotantI babhAse surasaridamalA vaijayantIva kAntA | bhUmiShTho yastathAnyo bhuvanagR^ihabR^ihatstambhashobhAM dadhau naH pAtAmetau payojodaralalitatalau pa~NkajAkShasya pAdau ॥12॥